كتير من المؤسسات الاقتصادية الدولية عبرت عن تفاؤلها بشأن الجنيه المصري في 2025 .. فيا ترى هل السنة دي هيكون فيها تحول كبير للجنيه المصري؟ وهل الجنيه هيرتفع تاني قدام الدولار بعد سنوات من التراجعات؟ وهل فعلا 2025 ممكن تكون سنة فارقة في مسار الجنيه؟

كل سنة في تقارير بتطلع من المؤسسات الاقتصادية العالمية عن التوقعات لأسعار العملات في العالم، والجنيه المصري كان ضمن العملات اللي اتكلموا عنها. رغم إننا مرينا بفترات صعبة، إلا إن التوقعات بتقول إن 2025 هيكون فيها تحسن واضح للجنيه المصري، وده بسبب بعض السياسات اللي اتبعتها الحكومة المصرية مؤخراً.

طب إيه أبرز التوقعات عن الجنيه المصري في 2025؟

البنك الفيدرالي الأمريكي قال إنهم متفائلين بمستقبل الجنيه المصري والسبب في ده هو إن الأجانب دخلين بقوة في الدين المحلي المصري..  وده هيدعم قدرة الحكومة إنها توصل للأسواق الدولية بسهولة أكتر.. ومن هنا بدأت الحكومة تشوف تحسن كبير في الفترة الأخيرة في قدرتها على إصدار السندات الدولية ومخطط الحكومة إنها تطرح ما بين 3 و 4 مليارات دولار في الأسواق العالمية، واللي ده هيدعم قيمة الجنيه بشكل كبير.

وكالة فيتش، واحدة من أكبر الوكالات الاقتصادية في العالم، قالت إن الجنيه المصري هيواجه شوية ضغوط في أول 3 شهور من 2025 بسبب استحقاقات أذون الخزانة، وكمان قوة الدولار الأمريكي. لكن في نفس الوقت الوكالة متوقعه إن التضخم هيستقر في مصر بعد الارتفاعات اللي حصلت في السنين اللي فاتت، وده هيسمح للبنك المركزي المصري إنه يخفف من السياسة النقدية، وبالتالي هيدعم نمو الإنفاق في السوق.

ومن المتوقع كمان إن البنك المركزي المصري ممكن يقلل الفايدة في 2025 بمقدار 900 نقطة أساس، والقرار ده هيكون في النصف التاني من السنة دي بعد ما الحكومة عملت مفاوضات ناجحة مع صندوق النقد الدولي بخصوص تأجيل رفع الدعم عن بعض السلع، زي الوقود والكهرباء، وده هيساعد في تخفيف الضغوط التضخمية على الاقتصاد.

إجمالاً.. التوقعات بتقول إن الجنيه المصري في 2025 هيكون في وضع أفضل كتير من السنوات اللي فاتت. والجميع بيتوقع إن الجنيه هيبدأ يرتفع تاني قدام الدولار بعد المعاناة اللي مر بيها في الفترات الماضية. هتكون سنة فارقة للجنيه المصري، وإحنا في انتظار نشوف إزاي هتتطور الأوضاع في الفترة الجاية.