إيه المفاجأة اللي فجرتها وكالة عالمية عن سعر الدولار والاستثمار والتدفقات الأجنبية.. وياترى مؤشرات الاقتصاد المصري رايحة على فين في 2025.. 

في الساعات الأخيرة وكالة فيتش سوليوشنز للتصنيف الائتماني العالمية طلعت تقرير مهم جدا عن الاقتصاد المصري وقالت فيه أرقام مهمة جدا زي مثلا إنها توقعت استمرار تعافي قطاع السياحة في مصر خلال 2025، وتوقعت زيادة أعداد السياح الوافدين للسوق المصري بنسبة 15% على أساس سنوي مقارنة بنمو 10.5% في سنة 2024.

الوكالة العالمية شرحت أسباب تفاؤلها لقطاع السياحة المصرية بأن التعافي الحالي سبب زيادة أعداد السياح القادمين من أوروبا والشرق الأوسط وتحسن معنويات السفر العالمية ومع عودة الهدوء في المنطقة هتستمر وتيرة التدفقات السياحية بصورة أكبر.

طبعا كلام فيتش جاي بعد ما حققت السياحة المصرية ايرادات غير مسبوقة قربت من 15 مليار دولار في ظل ظروف المنطقة الصعبة وكمان مصر على موعد مع حدث عالمي هيغير موازين السياحة في الشرق الاوسط وهو افتتاح المتحف المصري الكبير خلال كام شهر.

ونرجع لوكالة فيتش واللي اتكلمت كمان عن الاستثمار في مصر واللي توقعت إنه هيشهد نمو ملحوظ خلال 2025 ودا بدعم من الإصلاحات الهيكلية وتحسن معنويات المستثمرين  وتوقعت الوكالة وصول معدلات النمو الاقتصادي في مصر بنسبة 3.9% خلال العام الحالي ورشحت الوكالة عدد من القطاعات الرئيسية لقيادة النمو الاستثماري زي الطاقة والسياحة والبنية التحتية.

الوكالة اتكلمت في تقريرها عن أسعار الفايدة وتوقعت اتجاه البنك المركزي بخفض أسعار الفايدة بنسبة تصل إلى 9% خلال 2025 لينضم إلى قائمة البنوك المركزية الرئيسية التي بدأت في دورات التيسير النقدي.

نيجي للأهم في تقرير فيتش وهو توقعاتها عن سعر الجنيه المصري قدام الدولار وتوقعت تداوله بين 50 و55 جنيه في  2025، وفسرت دا باستمرار الضغوط على العملة خلال الربع الأول من نفس السنة نتيجة استحقاقات أذون الخزانة بالإضافة إلى قوة الدولار وتطورات تتعلق بالسياسات الأمريكية في ظل رئاسة ترامب.

أخر حاجة اتكلمت فيها فيتش كانت عن التضخم في مصر ورجحت استقرار ضغوط التضخم على مدار 2025 عند متوسط 16.8% على أساس سنوي مقارنة بـ28.3% في 2024 وقالت إن دا هيسمح للبنك المركزي بتبني سياسات نقدية ميسرة لدعم النمو الاقتصادي.

أكيد تقرير زي تقرير وكالة فيتش الأخير بيكون انعكاس للجهود الضخمة اللي اتعملت على مدار الشهور الصعبة اللي فاتت وفي نفس الوقت بيقول إن مصر على الطريق الصحيح.