إيه اللي ممكن يحصل لو فجأة الجنيه بدأ يستعيد قوته قدام الدولار؟ وهل فعلاً الجنيه ممكن يقلب الموازين في 2025؟ وهل الفترة اللي جاية هتبقى البداية لانتهاء رحلة هبوطه اللي استمرت السنين الأخيرة؟.. الإجابى على الأسئلة دي ممكن تقلب الموازين في الاقتصاد المصري
الجنيه المصري.. اللي عانى من تقلبات عنيفة قدام الدولار والعملات الأجنبية التانية خلال السنين اللي فاتت.. بدأ يظهر في الأفق شوية أمل إنه يرجع تاني على الساحة بقوة.. آخر توقعات لبنك الاستثمار العالمي "جولدمان ساكس" قال فيها إن الجنيه ممكن يستعيد جزء كبير من قيمته المفقودة خلال أوائل 2025 لأن فيه عوامل كتير بدأت تتحرك في الاتجاه الصح
طب ايه السبب فى التحسن اللى بتقول عليه جولدمان ساكس ؟
الفترة اللي فاتت شهدت موجة كبيرة من خروج الاستثمارات الأجنبية خصوصًا الأموال الساخنة واللي ضغطت على سعر الصرف.. لكن الخبر الحلو هنا إن التراجع ده كان سببه "موسمي" أكتر منه هيكلي.. ببساطة المستثمرين كانوا بيجنوا أرباحهم من أذون الخزانة اللي اشتروها في وقت أزمة التعويم الكبير في مارس اللي فات.. وده اللي خلّى الدولار يوصل لأرقام قياسية عند 50.90 جنيه لأول مرة
لكن الحكومة والبنك المركزي مش قاعدين شاكتين .. بالعكس البنك المركزي متوقع إنه هيبدأ يخفض الفايدة مع بداية 2025.. وده هيشجع المستثمرين يرجعوا للسوق المصري تاني من باب أوسع.. كمان وزارة المالية ناوية تتوسع في إصدار السندات طويلة الأجل بدل القصيرة.. وده هيخلق ثقة أكتر في السوق المصرية، ويفتح الباب لرجوع رؤوس الأموال الأجنبية
ومؤخرا.. فيه إشارات إيجابية بتقول إن السوق المصري بدأ يشهد اهتمام عالمي.. تقرير "HSBC" الأخير صنّف مصر كواحدة من أكتر الأسواق شعبية بين المستثمرين في منطقة الشرق الأوسط وقال إنها عندها "آفاق تفاؤلية" كبيرة
غير كده.. مصر حصلت السنة دي على خطة إنقاذ مالية بتجمع بين دعم من صندوق النقد الدولي والاتحاد الأوروبي وغيرهم.. وده بيؤكد أهمية مصر كمحور للاستقرار في المنطقة.. وده معناه إن فيه فرصة حقيقية للجنيه إنه يرتفع مع عودة الاستثمارات الأجنبية وتخفيف الضغوط الحالية على السوق
الخلاصة .. الجنيه المصري عنده فرصة كبيرة إنه يرجع يستعيد قوته قدام الدولار وباقي العملات الأجنبية.. لكن ده مش هيحصل بين يوم وليلة.. الكرة دلوقتي في ملعب الحكومة والبنك المركزي عشان يستمروا في الإصلاحات اللي تعيد ثقة المستثمرين وتحسن البيئة الاقتصادية..وكل ده هيفرق مش بس في سعر العملة لكن كمان في حياتنا اليومية، من أسعار السلع لفرص الشغل وحتى الاستثمار
إخلاء مسؤولية إن موقع جريدة الجوف يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق