الأيام اللي فاتت الحكومة أعلنت عن تسويق سندات دولية بقيمة وصلت ل2 مليار دولار.. ياتري اية حكاية السندات دي .. واية فايدتها للاقتصاد المصري.

مصر عندها أزمة كبيرة بسبب وجود فجوة تمويلية هتوصل لـ 10 مليار دولار في السنة المالية الحالية وده معناه أن الحكومة عايزة تمويل خارجي عشان تقدر العجز اللي موجود عندنا سواء كان في لسد العجز المالي في البنوك أو سداد القروض وفوايدها، وعلشان كده الدولة بتدور علي مصادر تمويل بديلة .

وعلشان كده الحكومة طرحت ولأول مرة سندات دولارية، وجت لها طلبات شراء بـ10 مليار دولار، وده بياكد عودة ثقة المستثمرين الدوليين بديون الدولة واللي كانت بتعاني من أزمة مالية كبيرة خلل الفترة اللي فاتت.

طيب اية حكاية السندات الدولارية اللي الدولة طرحتها دي ؟

مصر في الفترة اللي فاتت جمعت 2 مليار دولار من بيع أدوات دين طرحتها الحكومة على شريحتين لأجل  5 و8 سنين وده بسبب ان الحكومة عندها فجوة تمويلية بتوصل قيمتها لـ10 مليار دولار في السنة المالية الحالية اللي هتنتهي في يونيو اللي جاي.

عوائد الشريحة الأولي اللي طرحتها الحكومة واللي هيا أجل 5 سنين وصلت لـ 1.25 مليار دولار واللي هيا كانت بفايدة 8.625%، وكمان الحكومة جمعت 750 مليون دولار من الطرح التاني واللي هو أجل 8 سنوات وبفايدة 9.45%.

قرار الحكومة بطرح سندات دولارية جديدة جه بعد ما الحكومة أخذت قرض بقيمة 2 مليار دولار الأسبوع اللي فات من مجموعة مستثمرين إقليميين ودوليين وده بعد ما سددت تسهيلات بقيمة 3 مليار دولار في شهر نوفمبر اللي فات وكانت مصر باعت أول صكوك لها في 2023 بقيمة 1.5 مليار دولار. 

الحكومة المصرية حاليا عندها التزام أن إصدارات الدين الدولية متتجاوزش 4 مليار دولار في السنة المالية الحالية، والحكومة عندها أمل كبير أن خطة الإصدارات الدولية للسندات الدولارية تكون في مسارها المضبوط، وفي الفترة اللي جاية وتحديدا مع بداية السنة المالية الجديدة واللي هتبدا مع شهر يوليو اللي جاي، والحكومة هتطرح مجموعة من الإصدارات المتنوعة من السندات الدولارية وده بهدف عودة لمصر لسواق العالمية مرة تانية.

طيب هل مصر طرحت سندات دولارية قبل كده ؟.
أول طرح لمصر من السندات الدولارية كان قبل 2021، ووقتها الحكومة باعت فيه سندات بالدولار بقيمة وصلت لـ6.75 مليار دولار، وده كان من خلال اصدارين أولهم كان في شهر فبراير والتاني كان في شهر سبتمبر من نفس السنة.

عملية إصدار السندات  الدولارية اللي الحكومة طرحتها في الفترة اللي فاتت كانت بتقوم عليها مؤسسات كبيرة ومعروفة لكل العالم زي جيه بي مورغان تشيس وسيتي غروب وإتش إس بي سي هولدينغز، وغولدمان ساكس، وستاندرد تشارترد ودي كلها مؤسسات معروفة دولية ولها ثقل في العالم الاقتصادي.