يا ترى ايه سر اهتمام رجال الأعمال والمستثمرين بسوق العقارات في مصر في السنين الأخيرة، وليه بنلاقي مستثمرين تقال بيقتحموا السوق ده من أوسع أبوابه وجايين ينفذوا مشروعات كبيرة، هل في تسهيلات جديدة بتقدمها الحكومة لهم عشان يشتغلوا في مناخ صحي، ولا الأرباح اللي بتحققها العقارات في مصر بتغريهم.
في الفترة الأخيرة، الحكومة المصرية قررت تعزز شراكاتها مع القطاع الخاص، وده كان في ملفات كتيرة زي الصناعة والزراعة والتعدين وغيرها، وأخيرا كانت العقارات، وده بهدف زيادة الإنتاج وتعزيز الاقتصاد المصري، وتحقيق مكاسب للطرفين، خاصة وإن القطاع الخاص له تجارب ناجحة كتيرة وأثبت كفاءته بشكل كويس.
عشان كده، الحكومة المصرية قدمت مجموعة من التسهيلات للقطاع الخاص، زي الرخصة الذهبية، واللي قدرت تجذب استثمارات محلية وأجنبية بالمليارات وخاصة في العقارات.
وواقعيا، فالحكومة بتعتبر قطاع التشييد والبناء أو القطاع العقاري واحد من القطاعات الاقتصادية المهمة، عشان دوره المهم في دعم الاقتصاد، زي مثلا الدخل القومي اللي بيحققه سواء بالجنيه والدولار والعملات الأجنبية التانية، كمان بيوفر آلاف فرص العمل.
وبناءً على ده، فالدولة دلوقتي مهتمة حدا بالتوسع في إنشاء المدن الجديدة في مختلف المحافظات وتحسين وتطوير البنية التحتية، عشان تقدر تجذب أكبر عدد من المستثمرين في العقارات.
ونقدر نقول، إن برنامج عمل الحكومة لدعم الاستثمار العقاري، بتتخلص في تبسيط وتسريع عمليات الترخيص والموافقة على مشروعات البناء من خلال تنفيذ منصات رقمية لتقديم الطلبات والموافقات، وكمان الخطة بتشمل متابعة تصدير العقارات فى مصر وتحويل مصر إلى وجهة للاستثمار العقارى الدولي.
غير كده، الحكومة بتدعم القطاع ده وبتوفر له نماذج مختلفة من برامج الإسكان عشان يقدر يواجه الطلب المتزايد على مشروعاته، وبتفعل المنظومة الرقابية على المواصفات والمعايير البيئية لإنشاء المبانى الحكومية والخاصة والأهلية بجميع استخداماتها، وكمان بتسمح بالتوسع فى إنشاء المدن الخضراء المستدامة باستخدام تكنولوجيات الطاقة المتجددة وتدوير المخلفات وترشيد استخدامات المياه وإعادة تدويرها.
ضيف على كل ده، إن بيتم إصدار الدليل الاسترشادى لإنشاء الأبنية الخضراء الذكية والمستدامة، واللي بيشمل مواد البناء الآمنة، وأكواد تحقيق الاستدامة والبناء الأخضر عشان يضمن توافر سكن آمن ومتطور وصديق للبيئة.
وكل ده بيشجع الشركات العالمية انها تيجي مصر تستثمر في قطاع العقارات، عشان كده نقدر نقول إن مستقبل القطاع ده هيكون في حتة تانية خالص، خاصة وإنه بيحقق نمو وتوسع بصورة سريعة جدا، والدليل على كده هو زيادة إقبال المصريين في الخارج على شراء العقارات.
كمان، الحكومة مركزة جدا على جذب الأجانب لشراء العقار، عشان مع الخطوة دي مهمة جدا في خطة تحويل مصر إلى قبلة لشراء العقار زي دبي ومدريد واثينا، وتدخل فلوس بالملايين لاقتصاد البلد.
إخلاء مسؤولية إن موقع جريدة الجوف يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق