بيتنا الحبيب وزارة التعليم.. احنا تحت أمر العمل فى كل لحظة.. لكن احنا اللى بنطبق التعليمات والقرارات.. احنا بنحب عملنا ومخلصين ليه.. لكن يا ريت صوتنا بيكون مسموع وواصل ليكم.. يا ريت تشوفوا كلامنا.. لأننا ف الآخر.. أبناء مصر الغالية.. مصر ام الدنيا.. والمصلحة العامة تجمعنا كلنا حتى ان اختلفنا الرأى لأن عزيز مصر يشجع حرية الرأى والسيد وزير التعليم قال فى أثناء الحوار المجتمعى بوجود وزراء تعليم سابقين - نحن منفتحون على جميع الاراء - وانقل إليكم ما يلى:-

وقت اكتر للشرح

١- الأعمال الكتابية كتير وبتاخد وقت الحصة.. عايزين وقت اكتر للشرح ولتتفيذ الخطط العلاجية.. كراسة نشاط.. كراسة واجب.. كراسة تقييمات.. مهام ادائية.. كتير علينا حجم الكتابة دى كلها.. طب اعتبرونا ناس.. وتعالوا يا قيادات طبقوا حصة بنفسكم فى مادة تخصصكم.. وشوفوا ح تنجحوا فى الشرح مع إعطاء واجبات ومهام ونشاط وتقييمات ولا ح تعملوا ايه لتنفيذ الدرس كاملا.. دا ضغط كبير علينا..

الغاء التقييمات الكتابية

٢- اقترح عليكم الغاء التقييمات الكتابية وتحويلها إلى تقييمات شفهية تتم على مدار الشهر وبكدا نوفر وقت اكتر للشرح.. لأن الطالب بطىء فى الكتابة.. 

التقييمات مجابة من المكتبات

٣- هل التقييمات الموجودة على موقع الوزارة عملت المطلوب منها فنيا.. بالنسبة للوزارة نعم وبالنسبة للمعلم استفاد فنيا.. وبالنسبة للطالب وولى الأمر فيه ناس قوية بتذاكر وفيه ناس بتروح تشترى التقييمات مجابة من المكتبات والسيبرات علشان تنقلهم واجب او فى المدرسة.. واصبحت تجارة واكل عيش للمكتبات.. هل تعلم الوزارة ذلك ؟

التركيز على متابعة الواجبات والتقييمات اكثر من النظرة الفنية

٤- كثرة الأعمال الكتابية اخذ كثيرا من وقت الشرح.. حتى التوجيه اصبح تركيزه على متابعة الواجبات والتقييمات اكثر من النظرة الفنية ومناقشة فنيات المادة مع المعلم  ..

أسئلة تعتمد على توصيل الكلمة بالصورة

٥- فى تقييمات او واجبات الصفوف الأولى.. هناك أسئلة تعتمد على توصيل الكلمة بالصورة.. هل الطالب ح يرسم بسهولة ومرونة.. كذلك فى الصفوف العليا  تلاقى على الموقع ببعض الواجبات او التقييمات قطعة فى الإنجليزى او قطعة نحوية فى العربى.. الطالب ح ياخد كام وقت علشان يكتبها او يرسم الصورة.. 

التصحيح ورصد الدرجات كتير جدا 

٦- كمية التصحيح ورصد الدرجات أصبحت كتيرة جدا جدا.. لدرجة انكم اخدتوا المعلمين من حياتهم الشخصية.. لأن فيه زملاء بتشتغل رصد باقى الدرجات فى البيت وتصحيح اليوم كله حتى فى البيت.. علشان خاطر المتابعات اليومية..

 استخدام التكنولوجيا بدون نت

٧- استخدام التكنولوجيا.. ازاى وجزء كبير من مدارس مرحلة التعليم الاساسى ابتدائى واعدادى بدون انترنت..

٨- وقت لتنفيذ البرامج العلاجية للطلاب ضعاف المستوى.. اخباره ايه معاكم ؟

تعامل المعلمين مع طلاب الدمج

٩- هل هناك تدريبات جديدة اكاديمية معتمدة للمعلمين فيما يخص التعامل مع طلاب الدمج بحالاتهم المختلفة.. ولا مش ح تطلبوا تزودوا  بند ال ٢٥% اللى بيتقاضاها المعلم المتدرب على الدمج وبتثبتوا البند وعدد المعلمين لأسباب مالية ؟ دربوا باقى الموجهين وجزء جديد من المعلمين.. يا ريت..