يا ترى ليه الدهب بيحقق مستوى تاريخي وأسعاره في الطالع مع بداية سنة 2025، إيه هو السر خاصة بعد وقف إطلاق النار في غزة وحدوث تهدئة، طب هل الموضوع له علاقة بترامب وتداولاته ولا لأ؟، والأسعار رايحة فين في الفترة الجاية.

طبعا كلنا عارفين إن أحداث الحروب والصراعات أو أي حدث سياسي بيؤثر على اقتصادات العالم، وبالتالي الأسعار بتزيد والتضخم بيرتفع، وكمان أسعار الدهب بتعلى كل شوية.

وده لأن الدهب ملاذ آمن للادخار، فأغلب البنوك العالمية بتتجه في وقت الأحداث المضطربة لشراء كميات من الدهب عشان تحصن نفسها ضد أي ظروف أو أزمات اقتصادية ممكن تحصل، وده اللي حصل في السنة الأخيرة 2024 بسبب حرب غزة وكمان الحرب الروسية الأوكرانية.

طب يا ترى إيه اللي بيحصل للدهب مع بداية 2025؟

في الشهر الأول للسنة الجديدة، سعر الدهب العالمي حقق قفزة عشان يسجل انهاردة أعلى مستوى من 11 أسبوع بعد ما اتراجعت مستويات الدولار الأمريكي.

والكلام ده حصل بعد تصريحات الرئيس الأمريكي دونالد ترامب خلال خطاب تنصيبه لولاية ثانية، عشان يزيد من ظاهرة عدم اليقين في الأسواق بخصوص مستقبل السياسة الأمريكية.

ووفقا للي أعلنته مؤسسة "جولد بيليون"، فسعر أونصة الدهب العالمي، سجل في الساعات الأخيرة، أعلى مستوى منذ السادس من نوفمبر 2024، وسجلت 2733 دولار للأونصة.

واقترب سعر الدهب من أعلى مستوى تاريخي سجله في أكتوبر الماضي عند 2790 دولارا للأونصة، عشان يتحرك في اتجاه تصاعدي على المدى القصير بداية من 19 ديسمبر الماضي.

ولكن بعد أسابيع من التوقعات في الأسواق العالمية عن الرسوم الجمركية اللي هيفرضها ترامب، فجت تصريحات "ترامب" خالية من الإشارة للبدء الفوري في زيادة التعريفات الجمركية، عشان الأسواق تستنج بأن الرئيس الأمريكي هياخد وقت أطول عشان يفرض الرسوم دي.

ونقدر نقول، إن كل ده ساهم في حدوث ارتياح في أسواق الأسهم العالمية، لكن التأثير كان سلبي على الدولار الأمريكي اللي انخفض بأكثر من 1% امبارح، عشان يساعد سعر الدهب العالمي على الارتفاع، وده طبعا لأن في علاقة عكسية بتربط بينهم، فلو الدولار ارتفع فالدهب بينزل والعكس صحيح.

خد عندك كمان، إن تراجع سعر الدولار الأمريكي في الأيام الأخيرة، كان بسبب في توقع إن "ترامب" يرفع التعريفات الجمركية بمجرد توليه الرئاسة، بس ده فعلا ماحصلش، عشان كده اتراجع الدولار بعد ما حافظ على ارتفاعه وسجل أعلى مستوى في عامين خلال الفترة الأخيرة.

ومن ناحية إدارة ترامب، فهي شايفة إن فرض التعريفات الجمركية بشكل تدريجي هيحمي الاقتصاد الأمريكي من تأثير مباغت لارتفاع التضخم، ولكن بشكل عام فهو اتعهد بفرض تعريفات تجارية جديدة على الدول المجاورة له، وخاصة على الصين عشان يخفض عجزها التجاري، وده ممكن جدا يعيد قوة الدولار من تاني، وطبعا هيأثر على أسعار الدهب اللي مرجح إنها تنزل في الفترة الجاية سواء عالميا أو محليا.. إذن أغلب التوقعات بتقول إن الدهب هينزل الفترة الجاية بعد ما سجل ارتفاع تاريخي له مع بداية 2025.