نشر الدكتور عبد الرحمن محمد نائب مدير مستشفى رمد الفيوم ، أخصائي العيون ، على صفحته الشخصية بموقع التواصل الإجتماعي فيس بوك منشور ورسالة تحمل كل معاني الحزن والألم  لفراق فيه زوجته منال شعبان التي توفيت إثر حادث أليم أمام نادي قارون الرياضي بمحافظة الفيوم قائلاً: أكسجين الروح مكنتش كلمه وخلاص يا منال .. 
قسما بالله قدام ربنا وقدام الناس كلها مستحيل اشوف غيرك ولا هتجوز تاني
والله ما هتجوز تاني والله ما هتجوز تاني يامنال والدبلة مش هقلعها

انا فرغت حياتي ل اهلي وأهلها ابويا وامي وامها واخواتي وأخواتها وأولاد اخواتي في المستقبل وأولاد أخواتها 
دول اللي هكون مسؤول عنهم مسؤولية مباشرة
اخوها محمد واختي و اخويا انا متكفل بجوازتهم كلهم
اخوها شريف هو اخويا الكبير..

انا مراتي رحلتها خلصت في الدنيا بعد ما أدت واجبها كامل ومنتظراني حبيبتي اخلص رحلتي في الدنيا واعمل واجبي واجيلها
اشهد يارب انها كانت زوجة صالحه وضهر وسند ليا في كل الاوقات

انا اللي كنت مقصر يارب
انا اللي تقصيري كان سبب اني مقدرتش احافظ عليها اكتر من كده 
قصرت في صلاتي يارب وهي كانت مابتسيبش فرض
حبيبتي لما كانت تشوفني بتوضى ب استعجال كانت تزعقلي كأنها امي وتعلمني اعمل ايه 
حبيبتي كانت تصحي الفجر تصلي الفجر تصحيني معاها ذوق عافيه
حبيبتي كانت كل يوم جمعه لازم تخليني اقرا سورة الكهف معاها 
حبيبتي كانت تقولي يلا نصوم نص رجب نص شعبان وانا اقولها يابنتي ارحميني انا بصوم رمضان بالعافية واناغشها واصوم معاها عشان متزعلش 
انا اللي قصرت يارب
حبيبتي اقولها يامنال تعبت من شغل القوافل تقولي دي اكتر حاجة بحبها فيك لو سمحت قفلهم ٥٠٠ بس اقولها يابنتي هو رقم ٥٠٠ ده مش ناوي يجي ليه..
حببيبتي كل سنه كانت هي اللي بتجهز شنط رمضان انا كان عليا اجمع الفلوس من زمايلي في مستشفي الرمد وبعض الأصدقاء المقربين وهي اللي تنزل تشتري كل حاجة وتستخدم غرفة الأطفال في تجهيز الشنط 
انا مش هسيب فرض بعد كده مش عشان منال عشان ربنا عشان ربنا بيحبني وانا مطمن انها عنده دلوقتي هو احن عليها مني
مش هسيب فرض لاني عايز اقول لربنا والله انا راضي بقضاءك والله راضي بس والله العظيم صعبة يارب الحياة صعبة من غيرها يارب

يارب احنا كنا ناوين نعمل حقن مجهري الأسبوع الجاي وبدأنا في أول خطوة يارب فيه عشان هي اللي كانت نفسها في الخلفة وانا ياما اقولها والله ما فارق معايا أهم حاجة انتي معايا بالدنيا كلها
كان نفسها لو بنت نسميها قدس كنت دايما اقولها جهزتي الغدا ولا لسه يا ام قدس ولو ولد يكون اسمه نوح

مش هسيب فرض بعد كده يارب لأن والله العظيم بدون مبالغه اكتر وقت قلبي مرتاح فيه دلوقتي هو وقت الصلاه بس 
انا ندمان يارب علي كل تقصير عملته يارب انا بستغفرك وبتوب إليك وطالب عفوك ورضاك عني يارب انا عايز اكمل الواجب بتاعي زي منال يارب منال وحشتني جدا يارب ادخلها جنتك ووسع قبرها وانس وحدتها واعفو عنها واغفر لها 
يارب صبرني يارب

بالنسبة لشغلي انا مش هعرف اشتغل تاني شغلي في مجال طب وجراحة العيون ومجال الإدارة محتاج تركيز زيادة وبال صافي وده صعب بالنسبة لي تماما انا كنت بشتغل في أماكن كتير عشانها كانت أمنية حياتها يكون عندي عيادة خاصه بس مكنتش هتبقي ليها فايدة لأن الحياه في مصر محتاجة لف وتنطيط في اكتر من مكان عشان نعرف نعيش وللأسف دلوقتي معنديش طاقه نهائي ل ده وحاسس اني لو بطلت فترة مش هعرف ارجع تاني..

حواليا ناس كتير ناس قريبين مني جدا وناس قربوا مني اكتر وعارف أن دول ودول هدفهم أن حياتي وشغلي يرجعوا انا مقدر وقوفكم جنبي بس صعب والله صعب وفي نفس الوقت لو سمحتوا متسيبونيش لاني من غيركم مش عارف ممكن يحصلي ايه وهي حبيبتي مطمنة بوجودكم جنبي لغاية مانتقابل كلنا في الجنه 
ارجوكم متبطلوش دعاء ل منال وافتكروها دايما
ادعولي بالصبر بس ..

وتعود أحداث الواقعة إلى السابع والعشرين من يناير المنقضي ، حيث لقيت مهندسه في العقد الثالث من العمر مصرعها إثر تعرضها لحادث دهس أمام إحدى النوادي الرياضية بمدينة الفيوم ، بمحافظة الفيوم ، وعلى الفور تم نقل الجثمان إلى مشرحة المستشفى وتحرر محضر بالواقعة وتولت الجهات المختصة التحقيق.
وتمكنت قوات الأمن بمديرية أمن الفيوم من القبض على المتهم لتقديمه للعدالة.