استغاث مالك جديد المهندس مرتضي المنيلاوي، من مسئولي شركة تبارك ، بعد تعنت الشركة لدخول "الصنايعية" لشقته.

وقال صاحب المشكلة ،" انا كمان شاري شقة ب16 مليون في كومباوند 90 افينيو بالتجمع التابع لشركة TBK وفوجئت ان الشركة مانعة دخول الصنايعية بتوعي وفارضة عليا صنايعية تعبانين وسعرهم 10 اضعاف السعر العادي ومفيش اي شيء مُلزم للشركة بخصوص جودة التشطيب".

وتابع،" حاولت ادخل سيراميك ومعدات منعوني من ادخالها لشقتي، وعملتلهم محضر في القسم وللاسف اكتشفت ان زيي ناس كتير دافعين ملايين والشركة مبلطجة عليهم دا غير المشاكل اللي ملهاش اخر في ادارة الكومباوند والامن والنظافة!!".

وكانت قد حررت سيدة محضر بقسم التجمع ضد شركة تبارك للتنمية العقارية بتهمة البلطجة وتهديدها بالرغم من امتلاكها وحدة سكنية فى إحدى مشروعات الشركة.

واستعرضت سيدة تدعى الدكتورة منى الجنزوري ، إحدى ملاك وحدة عقارية بشركة تبارك للتنمية العقارية من مسئولى الشركة بعد تعرضها لتهديدات ، موضحه أن كل من حاول مساعدتها فى الحصول على حقها تم تهديده.

وقالت الدكتورة منى الجنزوري،" عملنا محضر سب وقذف وعملنا محضر اثبات حالة في قسم التجمع وأثبتنا منع شركة TBK من إدخال مواد تشطيب لشقتي.. وبعد ما نشرت البوست على الجروب هنا تواصل معنا اكتر من حد ذو شأن وصحفيين وصعدوا الموضوع لأعلى درجة ووعدوا بالحل ومحاسبة المسيء والمقصر".

واستغاث عدد من ملاك الوحدات السكنية بمشروعات شركة تبارك العقارية، من الشركة وسياساتها فى التعامل مع الملاك.

واستعرض عدد من الملاك مشكلاتهم مع الشركة وقالت سيدة، " انا ضحية جديدة من ضحايا شركة تبارك العقارية اللي غيروا اسمها وبقا TBK لان الاسم القديم بقا سيء السمعة..وللاسف اشتريت شقة في كومباوند 90 افينيو ب 11 مليون قبل ما اعرف ان عندهم مشاكل في كل مشاريعهم ..
بعد ما اشتريت الشقة من احد الملاك السابقين وروحت انقل الملكية فوجئت ان الشركة عايزة مني 120 الف مصاريف نقل ملكية "بلطجة" وان اي توضيب هوضبه في الشقة هيبقا عن طريقهم باضعاف سعر التوضيب العادي".

وتابعت المالكة لوحدة سكنية بمشروعات شركة تبارك العقارية، " اني لو حبيت اتنفس هدفع فلوس دخلت اعمل بحث عنهم على النت لقيت ناس كتير بيشتكوا منهم  وان في سيدة محترمة اسمها دكتورة منى مرت بنفس التجربة واشتكت نفس الشكوى تقريبا وكتبت بوست هنا على الجروب وعرفت كمان انهم جابولها بلطجية يتعدوا عليها وعلى زوجها".

وتابعت،وانها بدل ما تسكن في شقة دفعت فيها ملايين لقت نفسها يوميا في الاقسام والنيابة.. وللاسف انا برا مصر ومش عارفه اعمل ايه وخايفة ان الشركة يتعدوا عليا ومش عايزة اتبهدل في الاقسام والنيابة زي باقي السكان.. ارجوكم تضامنوا معايا وقولولي اعمل ايه لان انا اتنصب عليا زيي زي عشرات المتضررين من الشركة دي، وياريت تحذروا غيركم".

وقال متضرر آخر من شركة تبارك العقارية،"وتتوالى فضائح شركة تبارك TBK في كل مشروعاتها.. احنا ضحايا شركة تبارك في كمبوند كابيتال ايست مدينة نصر !! مستلمين شققنا من سنين بدون مرافق حتى اليوم كل يوم بيتم المماطله معانا ف المواعيد ..ووعود مختلفه .. بيتم عمل محاضر شهريه للسكان بسرقة التيار الكهربائي على الرغم انهم شاريين باغلى سعر متر ف المنطقه ! .. وبيتم ضياع مدخرات الناس وتعبهم وشقاهم بسبب تقاعس عن انهاء الاجراءات والانتهاء من نماذج المخالفات والساكن لا حول له ولا قوه !".