إيه سر اهتمام الرئيس السيسي بالزراعة في مصر؟ وليه مصر بتسعى تزرع أكتر وتصدّر للخارج؟ هل زيادة الإنتاج الزراعي دي خطوة مهمة لتحسين الاقتصاد؟ ولو كنا عايزين نحقق اكتفاء ذاتي هل ده كفاية؟ 

مصر أكيد مش غريبة عن أهمية الزراعة في اقتصادها..  لكن في الفترة الأخيرة شوفنا اهتمام كبير جدًا من الرئيس السيسي بتوفير كل الدعم للمشروعات الزراعية.

إيه اللي حصل؟ وليه بنشوف التركيز ده؟

ببساطة مصر عايزة تحقق اكتفاء ذاتي في السلع الزراعية وفي نفس الوقت تصدّر الفائض.. وفي اجتماع اتعمل مؤخرا  الرئيس السيسي اتكلم عن ضرورة التوسع في رقعة الأراضي الزراعية، وزيادة الإنتاج الزراعي علشان نقدر نحقق الاكتفاء الذاتي من السلع الاستراتيجية اللي بنستوردها من بره.

الرئيس كمان عايز الفائض ده يتصدر للخارج.. وده معناه ان مصر مش بس هتأمن احتياجاتها الغذائية لكن كمان هتبقى قادرة على تصدير منتجاتها الزراعية وتعزز الاقتصاد.

في الاجتماع ده كان فيه تركيز على تطوير منظومة الري في مصر وتطوير الميكنة الزراعية.. يعني ببساطة الرئيس مش بس بيتكلم عن الأرض لكن كمان بيتكلم عن التكنولوجيا الحديثة في الزراعة واستخدام أفضل الوسائل لتوسيع الرقعة الزراعية.

لكن ده مش كل حاجة.. في نفس الاجتماع الرئيس السيسي شدد على ضرورة إنشاء صوامع لتخزين الغلال والحبوب.. لأن عندنا محاصيل زراعية كتير وعلشان نقدر نحفظها ونستفيد منها في وقت الحاجة لا بد من تخزينها بشكل آمن وجيد.

طب تعالوا نرجع شوية ونشوف ازاي مصر قدرت توسع في الزراعة خلال الخمس سنوات الأخيرة.. مصر استطاعت استصلاح 2 مليون فدان من الأراضي الصحراوية. . ده مش رقم بسيط، وبعدين الحكومة مش وقفة هنا والهدف إننا نوصل لـ4 مليون فدان عن طريق استكمال المشروعات القومية في التوسع الأفقي.

ونقدر نقول إن زيادة الإنتاج الزراعي خطوة في الطريق الصحيح.. لأن ده مش بس بيساهم في تقليل الاعتماد على الاستيراد لكنه كمان بيخلق فرص عمل جديدة وبيدعم الاقتصاد المصري بشكل عام.

وكمان التوسع في الزراعة بيدعم الأمن الغذائي في مصر.. بحيث يبقى عندنا قدرة على توفير السلع الأساسية للمواطنين بأسعار مناسبة.. وده في حد ذاته بيساهم في تحسين مستوى المعيشة.

باختصار الرئيس السيسي مهتم بشكل كبير بزيادة الإنتاج الزراعي في مصر.. مش بس علشان تحقيق الاكتفاء الذاتي، لكن كمان علشان تحقيق فائض زراعي يقدر يتصدر للخارج… وزيادة الإنتاج الزراعي مش بس خطوة لتحسين الوضع الغذائي في مصر لكنها كمان خطوة أساسية لتحسين الوضع الاقتصادي بشكل عام.. والفائدة الكبرى هي تحسين مستوى معيشة المواطن المصري.. والأهم من ده كله.. ده بيضمن لمصر دور أكبر في أسواق العالم كمصدر رئيسي للمنتجات الزراعية.