يا ترى ايه سر القفزة الضخمة في احتياطيات البنك المركزي المصري من الدهب؟! والقفزة دي حصلت ازي وعملوا فيها إيه بالظبط؟ وليه البنك المركزي بيشتري دهب أصلاً؟ وهل ده معناه إننا رايحين على أزمة مالية جديدة؟! وفيه تأثيرات حقيقية على الاحتياطي النقدي؟

الاقتصاد المصري مَرّ بتقلبات كتير في السنين الأخيرة.. لكن في حاجة حصلت في 2024 وهي القفزة الكبيرة في احتياطيات البنك المركزي المصري من الدهب.. لدرجة إن الأرصدة بتاعة الدهب زادت بمقدار 107.7% في سنة واحدو بس .. يعني من 260.2 مليار جنيه في 2023 وصلوا لـ 540.4 مليار جنيه في 2024.

طب إزاي حصل ده؟ وليه البنك المركزي قرر يشتري دهب؟

بسبب التقلبات الاقتصادية العالمية كان لازم يكون فيه "ملاذ آمن" للبنك المركزي علشان يحمي احتياطيات الدولة.. الدهب دايماً كان بيعتبر من الملاذات الآمنة في أوقات الأزمات.. زي ما شفنا مع الارتفاع الكبير في أسعار الذهب خلال العام الماضي.. في أكتوبر 2024 سعر الأونصة وصل لحدود 2790 دولار وده كان أعلى سعر للذهب في التاريخ .. يعني، لو أنت مركز على شراء الذهب دلوقتي، مش بس بتحافظ على قيمته، لكن كمان بتحقق أرباح كبيرة مع صعود أسعاره.

طب ليه البنك المركزي بيزود أرصدة الذهب؟

الجواب ببساطة هو التنويع.. البنك المركزي مش بيحط كل احتياطياته في مكان واحد.. جزء منها بيكون في العملات الأجنبية زي الدولار واليورو وجزء تاني بيكون في الدهب…  لأن الدهب بيحتفظ بقيمته على المدى الطويل خاصةً في وقت الأزمات المالية أو التوترات الجيوسياسية وده اللي حصل في 2024، لما التوترات العالمية كانت في أوجها.

طيب تأثير ده على الاقتصاد المصري؟

بدايةً القفزة الكبيرة دي في أرصدة الدهب بتعني إن البنك المركزي بيعمل استثمار طويل الأمد في أصوله.. ومع الارتفاع الكبير في أسعار الدهب ده يعني إن قيمة الاحتياطي النقدي المصري زادت بشكل قوي. و ده ممكن يساعد مصر في مواجهة أي تقلبات اقتصادية مستقبلية سواء كانت بسبب الأزمات العالمية أو بسبب تذبذب العملات.

وإذا كنا بنتكلم عن التأثيرات المالية بشكل عام فزيادة قيمة احتياطي الدهب بتساهم في تحسين ثقة المستثمرين في الاقتصاد المصري..  المستثمرين سواء محليين أو دوليين بيشوفوا إن البنك المركزي عنده مخزون من الأصول الثابتة والمستقرة زي الدهب وبالتالي ده بيقلل من مخاطر الاستثمار في مصر.

وإيه تأثير ده على مستوى الاحتياطي؟

معدلات الاحتياطي النقدي بتكون مؤشر على قوة الاقتصاد وقدرته على سداد التزاماته الدولية..و لما البنك المركزي يشتري دهب بيزود من قوة احتياطياته.. كمان لو حصلت أزمة مالية عالمية الدهب بيساعد في حماية الاحتياطي المصري من التقلبات.. يعني ببساطة البنك المركزي مش بيحط أمواله في خطر ده بيستثمر في أصول مستقرة اللي بتساعده على مواجهة أي أزمة.

وفى نقطة مهمة لازم نتكلم عنها وهي زيادة في الأرباح.. البنك المركزي المصري حقق صافي أرباح ضخمة وصلت لـ 118.7 مليار جنيه بنهاية ديسمبر 2024، مقارنة بـ 98.01 مليار جنيه في 2023.. وده معناها إن البنك المركزي مش بس زود احتياطياته من الذهب ده كمان عنده قدرة على تحقيق أرباح ضخمة. وده شيء إيجابي جداً للسياسة المالية في مصر. وده بيشجع الحكومة على تحسين وضع الاقتصاد من خلال تقوية الاحتياطي النقدي وتوسيع القاعدة المالية.