يا ترى القطاع العام فى مصر ممكن يرجع يشتغل تانى ويقود عجلة الاقتصاد زي مان؟ وايه خطة الحكومة لتطوير شركات القطاع العام؟  وايه المكاسب المتوقعة من عودة القطاع الحيوي ده تاني؟

الحكومة شغالة على خطة كبيرة جدًا عشان تطور مصانع وشركات القطاع العام.. وده هيساهم في تحسين الاقتصاد وفتح فرص عمل جديدة.. ومصر مش غريبة عن مصانع القطاع العام.. اللي كانت يوم من الأيام مصدر أساسي لإنتاج السلع الأساسية وركيزة من ركائز الاقتصاد المصري.. لكن مع مرور الزمن بعض الشركات دخلت في دائرة التراجع وبقى لازم نلاقي حلول لتحسين أدائها.

الحكومة المصرية مش واقفة عند الكلام.. لكن بدأت تنفذ خطة ضخمة لتطوير شركات قطاع الأعمال العام.. الدكتور مصطفى مدبولي رئيس الوزراء اجتمع مع المهندس محمد شيمي وزير قطاع الأعمال العام.. عشان يناقشوا تقرير عن تطوير الشركات والمصانع التابعة للوزارة.. الهدف واضح تعظيم العائد على الأصول المملوكة للدولة.

لكن السؤال الأهم إزاي ده هيحصل؟

التطوير في مجال الصناعات الكيماوية.. شركات زي "القابضة للصناعات الكيماوية" بدأت مشاريع تطوير كبيرة زي مصنع "كيما 1" لإنتاج نترات الأمونيوم وحامض النيتريك.. وتكلفة المشروع بتتجاوز الـ 6.4 مليار جنيه.

وزارة قطاع الأعمال كمان عملت مشاريع لإعادة تأهيل مصانع كانت متوقفة زي مصنع "الفيروسيليكون" في شركة "كيما"، بتكلفة 53 مليون جنيه. الغرض إعادة تشغيل المصنع وتحقيق إنتاج جديد يعزز الاقتصاد.

لكن مش الصناعات الكيماوية بس كمان قطاع الأسمدة له نصيب من التطوير.. مشروع تطوير شركة "الدلتا للأسمدة" بيتضمن مرحلتين الأولى صيانة مصانع "الأمونيا" و"اليوريا" بتكلفة 60 مليون يورو وفي المرحلة التانية هيتم رفع الطاقات الإنتاجية بالتعاون مع مستثمرين، بتكلفة تصل 450 مليون يورو.

وفي قطاع السيارات.. شركة "النصر للسيارات" رجعت تشتغل تاني..و الحكومة بتعمل على تطوير خطوط إنتاج جديدة مع شركات عالمية زي مصنع الأتوبيسات.

وفي مجال الألومنيوم.. شركة "مصر للألومنيوم" بدأت في تركيب ماكينة جديدة لإنتاج سلك الألومنيوم ودي خطوة كبيرة جدًا في تقليل الواردات وتعزيز الإنتاج المحلي.

طب هل عودة الشركات دي هي الحل السحري؟

لازم نفهم إن الحكومة مش بس بتطور المصانع.. كمان بتبحث عن طرق جديدة لتشغيلها بالشراكة مع القطاع الخاص.. الشراكة دي هتفتح الباب لتطوير أفضل وزيادة الإنتاج.. لكن المشروعات دي مش كلها صناعية.. فيه مشروعات تانية  زي مشروع شركة "إيجوث" لتطوير الفنادق الحكومة شغالة على تجديد فندق الكونتيننتال بتكلفة تقدر بـ 8 مليار جنيه.. وهيكون فندق 5 نجوم بأكثر من 300 غرفة.. دي خطوة كبيرة عشان نرفع مستوى قطاع السياحة في مصر.

الحكومة كمان مش ناسية قطاع الغزل والنسيج… تطوير شركة "مصر للغزل والنسيج" في المحلة الكبرى بيشمل استثمار ضخم بتكلفة تتجاوز 9 مليار جنيه.. ولو فكرت في كل ده مع بعض، هتكتشف إن الحكومة مش بس بتعمل شغل عادي لكن بتبني مصر جديدة على أسس صلبة. وده هيأثر على كل شيء، من الاقتصاد لفرص العمل، لزيادة الإنتاج المحلي.