الدولة حاليا هتبدأ عهد جديد من تنمية الاقتصاد خصوصا مع عودة تشغيل أهم مجري ملاحي في العالم وهو قناة السويس.. ياتري الدولة مستهدفة اية من قناة السويس .. والايرادات اللي مستهدفة هتوصل لكام.

15 شهر كاملة عاشت فيهم الدولة المصرية في مشاكل اقتصادية كبيرة بسبب تراجع الايرادات الدولارية من مصادر الدخل الرئيسية وخصوصا قناة السويس واللي هيا أهم مجري ملاحي في العالم، واللي بسبب التوترات الجيوسياسية في الشرق الأوسط ايراداتها تراجعت باكثر من 70% عن الارقام اللي كانت القناة بتحققها في الأوقات اللي فاتت.

طيب الجديد بالنسبة لقناة السويس وهل هنشوف القناة ترجع تحقيق ايرادات كبيرة مرة تاني؟.
من كام يوم العالم كله تفائل بإنفراجة التوصل لاتفاق لعودة التهدئة في الشرق الأوسط، واللي كان له انعكاسات علي الاقتصاد العالمي بشكل عام والاقتصاد المصري بشكل خاص، وده بسبب أن مصر بتعد من أكثر الدول اللي حصل عندها مشاكل اقتصادية في مجالات كتيرة بسبب التوترات اللي كانت موجودة في المنطقة العربية.

قناة السويس واللي بتعد واحد من أهم مصادر الدخل القومي المصري حصل فيها تراجع كبير في الإيرادات بسبب الضربات اللي كانت بتقوم بيها بعض القوي المتصارعة في المنطقة العربية علي السفن المارة علي طول الخط الملاحي للبحر الأحمر واللي كانت في طريقها للعبور من قناة السويس، وبسبب الضربات دي في عدد كبير من السفن التجارية غير خط سيره من العبور من المجري الملاحي للقناة للعبور من مسارات تانية وهيا الدوران حوالين قارة افريقيا وده كلف السفن وقت طويل علي ما توصل للبحر الأحمر، ده التهديات الكبيرة اللي تعرضت لها حركة التجارة العالمية خصوصا أن قارة أفريقيا معروفة بارتفاع نشاط القرصنة والهجوم علي السفن التجارية.

بعد ما القوي المتصارعة وصلت لاتفاق ملزم لوقف إطلاق النار في المنطقة، الحكومة المصرية أخذت قرارات سريعة بعودة تطوير وتحديث المجري الملاحي للقناة لاستيعاب حركة الملاحية المتوقعة الكبيرة اللي هتكون في القناة في الفترة اللي جاية خصوصا في عدد كبير من الشركات التجارية حوالين العالم أجلت نسبة كبيرة من رحلاتها التجارية بسبب التوترات اللي كانت موجودة في المنطقة العربية.

الحكومة المصرية كشفت في وثيقة لها عن خطتها لتطوير حركة الملاحة الجوية بمجري القناة زيادة الإيرادات، ومصر بتستهدف أنها توصل بإيرادات القناة لـ88.1 مليار دولار في الفترة من 2024 ولحد 2030، وده هيحصل من خلال استهداف زيادة إجمالي السفن اللي هتمر في القناة لـ190.7 ألف سفينة بحمولة 13.4 مليار طن خلال نفس الفترة.

مش كده بس، الوثيقة بينت كمان أن الدولة بتستهدف زيادة استثمارات القطاعات الصناعية في المنطقة الاقتصادية لـ 5.4 تريليون جنيه في 2030، وده هيحصل من خلال تحويل قناة السويس لمركز إقليمي للطاقة الخضراء وإنشاء مناطق اقتصادية وخدمات بحرية ولوجستيات واتصالات وتكنولوجيا المعلومات وتقنيات مالية وتجارة للترانزيت، ده غير الوصول لتوفير مليون فرصة عمل مباشرة في 2030.